31 Oktober 2022
Die landbou-organisasie, TLU SA, sê die jongste dieselprysverhoging – wat more om middernag in werking tree – kan die laaste strooi wees wat die kameel se rug breek.
Volgens dié organisasie se hoofbestuurder, Bennie van Zyl, het die nuwe plantseisoen in die somer-reënvalstreek pas afgeskop te midde van dieselpryse wat ‘n nuwe rekord-hoogtepunt sal bereik.
Van Zyl sê insetkoste is aan die toeneem en baie boere sal nou somme moet maak om te kyk of dit nog winsgewend gaan wees om te plant.
Die noordelike streeksvoorsitter van TLU SA, Henk van de Graaf, sê diesel is nou byna tien-rand per liter duurder as ‘n jaar gelede en sê dié organisasie wil nou weet wat die regering gaan doen om die stygende prys onder bedwang te bring om boere in produksie te hou sodat landsburgers kos op die tafel kan hê.
