16 Mei 2023
Raadslede verbonde aan die Thabazimbi-plaaslike munisipaliteit is sedert 11:00 vanoggend verhoed om die munisipale gebou binne te gaan nadat die ANC glo ‘n veiligheidsmaatskappy aangestel het om wag te hou.
Volgens ‘n VF Plus-raadslid in die munisipaliteit, Frik Erasmus was nagenoeg 30 veiligheidsbeamptes steeds teen 15:00 buite die gebou en kan raadslede nie die gebou binnegaan nie.
Hy sê lede van die koalisie beheerde munisipaliteit wou net voor 11:00 met ‘n koukusvergadering begin, waarna ‘n raadsitting 14:00 moes begin. ‘n Onderonsie het egter ontstaan waartydens lede met klippe bestook is, en skote is ook afgevuur.
Die Thabazimbi-munisipaliteit is een van net twee munisipaliteite in Limpopo wat na die 2021 plaaslike verkiesing deur ‘n DA-koalisie gelei is. Tokkie Swanepoel van dié koalisie is destyds as burgemeester verkies.
Die ANC-lede in die munisipaliteit het egter aan die einde van 2022 besluit om ‘n sogenaamde “parallelle” munisipale raad saam te stel. Dit nadat die ANC ‘n mosie van wantroue teen die DA-raad ingestel het. Dus het die dorp “twee burgemeesters en twee munisipale bestuurders.”
‘n ANC-raadslid, Judith Mohapi is aan die einde van Maart vanjaar deur ‘n pastoor as “burgemeester” ingehuldig nadat plaaslike landdroste geweier het om haar in te huldig.
Volgens Erasmus staan dienslewering in Thabazimbi stil weens die politiekery. Hy sê belangrike kwessies moes juis vandag bespreek word. Hy het teen 15:30 aan Pretoria FM gesê dat lede van Wet en Orde binne die stad by die gebou opgedaag het om beheer oor die situasie te probeer neem.
