16 Januarie 2024
Die Vrystaat se graad 10-leerlinge was dié provinsie se swakste presteerders in die eindeksamen in 2023 nadat 37,2% – oftewel 23 671 van die 63 655 kandidate wat geskryf het – gedruip het.
Hul graad 8-eweknieë het nie veel beter gevaar nie met 25,9% – oftewel 17 386 van die 66 889 wat geskryf het – wat nie die paal gehaal het nie.
‘n Woordvoerder van die provinsiale onderwysdepartement, Howard Ndaba, sê hulle is bekommerd nadat die slaagpersentasie in albei grade met 4% gedaal het van die vorige jaar af.
Hy het bygevoeg dat – as gevolg van die Covid-19-pandemie en die meegaande inperkings in 2020 – kon leerlinge nie die nodige vaardighede aanleer nie en dat dit veral in basiese grondslagvaardighede – soos wiskunde en tale – kop uitsteek.
Om in hierdie grade te slaag moet die leerlinge minstens 40% vir wiskunde en 50% vir huistaal behaal.
