Die VF Plus sê hy het bedenkinge oor die uitvoerbaarheid van die Mangaung-metro, in Bloemfontein, se hersiene 2025/2026-geïntegreerde ontwikkelingsplan (GOP) en meen dit kan weer onvervulde beloftes vir inwoners inhou.
Die VF Plus-raadslid in die Mangaung-metro, Elizabeth Snyman-van Deventer, sê 2025 is die laaste van ’n vyfjaar-beplanningsiklus en is dus die laaste kans vir die raad om sy mandaat aan die inwoners van die Mangaung-metro na te kom.
Volgens Snyman-van Deventer is die metro se GOP gegrond op planne om Bloemfontein internasionaal en plaaslik te bemark as ‘n veilige en aantreklike bestemming om in te woon, werk en belê.
Sy meen die plan is egter vol tekortkominge en het ’n gebrek aan implementering en aanspreeklikheid.
“’n Uitvoerbare GOP bepaal onder meer of gemeenskappe toegang sal hê tot skoon water, werkende straatligte, veilige paaie en funksionele sanitasie,” sê Snyman-van Deventer. Sy sê ekonomiese ontwikkeling kan nie floreer wanneer bestaande ondernemings hul deure moet sluit weens toenemende swak dienslewering nie.
“Sonder dringende hervorming sal die hersiene GOP vir 2025/2026 nie anders wees as die mislukkings van die afgelope vier jaar nie.”
