‘n VF Plus-raadslid in die Tshwane-metro sê hy wou tydens ‘n afgelope raadsvergadering weet waarom die metro nie na wense presteer wanneer dit by dienslewering kom nie.
Nick Pascoe sê die VF Plus is bekommerd oor die metro se vlak van vordering met kapitaalprojekte en prestasies soos weerspieël in die derde kwartaal se dienslewering- en implementeringsplan.
Hy sê luidens die verslag toon 24 projekte in die Tshwane-metro 0% vordering, 43 projekte presteer tussen 1% en 39%. Slegs 15 projekte (minder as 15%) toon vordering tussen 70% en 99%.
Pascoe sê ten opsigte van kapitaalprojekte is slegs 32% van 158 projekte tot dusver sinvol uitgevoer. Dit beteken byna een uit elke sewe projekte het geen vordering getoon nie.
Volgens hom is dit onaanvaarbaar dat belangrike infrastruktuur- en diensleweringsprojekte in die hoofstad van Suid-Afrika op hierdie wyse vertraag word of glad nie vorder nie.
Die VF Plus eis dat elke departement en burgemeesterskomiteelid aanspreeklik gehou word vir hul verantwoordelikhede en dat onderprestasie as ‘n noodgeval behandel behoort te word.
2 Responses
Ja die salaris is al wat hulle wil hê. Voor 1994 het raadslede net bywoning gelde gekry. Dit was eer om raadslid te wees. Nou is dit net vorm van inkomste sonder aanspreeklikheid. Vat die salaris weg en raadslid word net volgens bydrae van diens besoldig
Ek kan Francois se kommentaar bevestig. My oorlede skoonvader was vir twee termyne in die vroeë 1960-jare burgemeester van Pretoria. Ampshalwe het hy ‘n skamele klere-toelaag gekry, maar hy en die ander raadslede het geen ander vergoeding vir hul dienste ontvang nie. Nietemin was daar geen sprake van slaggate, gebarste waterpype, oorlading van elektriese substasies en swak beplanning nie. Terloops, dit is juis as gevolg van swak beplanning gepaardgaande met oorbevolking sonder dat aandag gegee word aan die opgradering van al die infrastruktuur dat ons swaarbelaste inwoners gestraf word met krag onderbrekings en slaggate in die strate. Begrotings is ook van geen waarde as dit nie uitgevoer word nie.