Hoofstuk 7 – 10 Augustus 2023
Die uitsendings van “die stasie te velde” het baie gou ’n tameletjie vir die owerhede geword.
Beeld, het op 23 September 1993 soos volg berig:
”Die Departemente van Binnelandse Sake, Pos- en Telekommunikasiewese en Wet en Orde, kon gister nog nie besluit wie se dilemma die onwettige uitsendings en wie, volgens die wet, teen die radiostasie moet optree nie.”
’n Eerste poging om die tameletjie te ontlont, is geneem toe minister Danie Schutte die bestuur van die stasie uitgenooi het om die saak te kom bespreek.
Rapport van 26 September 1993 vertel die verhaal van hierdie byeenkoms.
“’n Dreigende botsing tussen die Regering en die regse radiostasie, Radio Pretoria, is gister afgeweer toe die sender vanaf sewe uur gisteraand sy uitsendings gestaak het… In ’n gesamentlike nuusverklaring sê mnr. Schutte en ds. Mossie van den Berg dat die sender sy uitsendings van gisteraand af sou staak ten einde ’n dringende aansoek om ’n tydelike lisensie tot die minister te rig…
Gisteraand se verrassende wending rondom Radio Pretoria volg op bespiegelings van selfs ’n gewapende botsing indien die regering sou probeer om die sender te sluit.”
Die stasie se aansoek om ’n tydelike lisensie was toe suksesvol en op 28 September (slegs 10 dae na die eerste uitsendings en 2 dae na die gesprek tussen die bestuur en Minister Danie Schutte) is uitsendings met ’n tydelike lisensie hervat wat tot 31 Oktober 1993 geldig sou wees.
31 Oktober 1993 was Hervormingsondag.
Die radio het die dag programme uitgesaai wat die werk van Martin Luther en ander kerkhervormers gedenk het. Jaap Diedericks het jare later vertel dat die uitsaaipersoneel by die verstryking van die tydelike uitsaai-lisensie op 31 Oktober 1993 vir Ds Mossie gevra het wat moet hulle nou maak.
Sy antwoord: “Nou gaan ons net aan!”
Op daardie oomblik is die radio gebore met ‘n oorlewingskrag om “net aan te gaan”, wat hom in die jare wat sou volg, onstuitbaar sou maak.
