2 Junie 2021
Die departement van openbare ondernemings en die Suid-Afrikaanse Lugdiens (SAL) het genoem dat die lugdiens nóg minstens R3,5-miljard aan hulppakette oor die volgende drie jaar gaan nodig hê.
Dié betrokke partye het vroeër vandag verslag gedoen aan die parlement se portefueljekomitee. Die waarnemende direkteur van dié departement, Melanchton Makobe het in die verslag aangedui dat die R10,5-miljard, wat reeds aan die SAL toegestaan is, nié genoeg gaan wees om die lugdiens ten volle te herkapitaliseer nie.
Volgens die minister van die departement, Pravin Gordhan, is dit niks nuuts nie maar dat dit altyd deel van die plan was.
Dié bedrag sal die totale waarde van die reddingsboei wat na dié lugredery uitgegooi is sedert hy in Desember 2019 om sakeredding aansoek gedoen het, op R14-miljard te staan bring.
Volgens Makobe sal die bykomende R3,5 miljard hoofsaaklik gebruik word om die laaste krediteure van die SAL af te betaal, ten bedrae van R2,3 miljard.
