5 Desember 2022
“Ons het Cyril Ramaphosa ‘n regverdige kans gegee om homself te bewys, maar hy het misluk. Ons sal hom op dieselfde manier hanteer as wat ons Jacob Zuma hanteer het. Hy moet bedank.”
Die leier van die EFF Julius Malema sê enige plek waar Ramaphosa praat, sal hulle hom keer, omdat hy sy rol as president verontagsaam het. Malema het vanoggend ‘n mediakonferensie gehou oor die Phala Phala-aangeleentheid.
Die onafhanklike artikel 89-paneel het verlede week in ‘n verslag bevind dat Ramaphosa strafregtelik vervolg kan word weens die buitelandse valuta wat op sy wildsplaas gesteel is.
Malema het ‘n beroep op alle EFF-lede gedoen om Ramaphosa te keer om sy werk as president te doen, en meen dit moet vir hom onuithoubaar word totdat hy bedank.
Hy sê die land se president moet iemand wees met integriteit en nie skynheilig nie. Volgens Malema het Ramaphosa twee persoonlikhede.
