22 Augustus 2022
Die Suid-Afrikaanse Federasie van Vakbonde (Saftu) sê die fokus van Woensdag 24 Augustus se nasionale eendag-staking is nié die hoeveelheid werkers wat ‘n optog in die strate hou nie, maar sê werknemers kan ook by die huis staak om die land se ekonomie tot ‘n stilstand te dwing.
Saftu en die Kongres van Suid-Afrikaanse Vakbonde (Cosatu) het ‘n beroep op werknemers gedoen om Woensdag te staak, al beteken dit hulle bly by die huis.
Die organisasie se sekretaris-generaal, Zwelinzima Vavi sê hy het ‘n dokument van meer as 50 bladsye saamgestel met griewe. Dit sluit onder meer werkers se lae lone in, asook die stygende brandstofpryse, beurtkrag en die aanvalle op veiligheidswagte en vragmotorbestuurders.
Vavi meen die regering is vinnig om die sogenaamde “zenofobie-kaart” te speel, maar meen die probleme in die land is nie buitelanders se skuld nie. “Wie is verantwoordelik vir die handhawing van wet en orde in die land? Die regering.”
Vavi meen die gevaarlikste misdadigers in die land is diegene met pakke klere aan.”
Hy sê enkele optogte gaan Woensdag gehou word, maar werknemers kan ook by die huis bly en weier om werk toe te gaan.
