11 Desember 2024
Die EFF sê hy wil wegdoen met alle sogenaamde Apartheid-simbole en wil ook die sport, kuns en kultuur-arena herskep.
In ‘n besprekingsdokument – wat opgestel is in aanloop tot die EFF se kieskonferensie, wat Vrydag plaasvind, – sê die party dat daar na ‘n alternatiewe Afrikaanse lied gekyk moet word om die deel van “Die Stem” in die Volkslied te vervang.
Volgens die party sal daar ook ‘n grootskaalse naamsverandering van dorpe, stede, riviere en berge moet plaasvind.
‘n Bespreking oor ‘n aantal wysigings van wette en strukture sal ook op die sakelys wees. Volgens die EFF het die simbole ‘n bitter smaak in mense se monde gelaat, selfs nou 30 jaar na die aanvang van die nuwe bedeling.
‘n Ander punt wat bespreek gaan word is sporttoerusting. Die party meen sogenaamde wit skole geniet voorkeur wanneer dit kom by sporttoerusting en toegang daartoe.
