Die leier van die DA, John Steenhuisen, sê hy is steeds en sál verbind bly tot die regering van nasionale eenheid (RNE).
Dit kom nadat die ANC se sekretaris-generaal, Fikile Mbalula, gesê het dat dit die DA se keuse sal wees as hulle die RNE wil verlaat, al dan nie.
Die situasie tussen die twee partye is gespanne nadat die DA een van die partye was wat nié die 2025-begroting in die parlement gesteun het nie. Die adjunk-president, Paul Mashatile het gister gesê dat hy sou skaam kry as hy ‘n DA-minister was omdat die party teen die regering gegaan het waarvan hy deel is.
Steenhuisen sê die DA het deel van die RNE geword om ‘n werklike verskil te maak in Suid-Afrika se ekonomie, en om werk te skep, en dat die party steeds daartoe verbind is.
Hy sê om egter te voldoen in sy doelwit moet die ANC kan bewys dat hy ‘n ewe toegewyd is tot die gees en inhoud van die deel van mag. Volgens hom moet die partye saam werk omdat die kiesers in verlede jaar se verkiesing aangedui het dat hulle nie meer ten gunste is van een party wat die land regeer nie.
Volgens Steenhuisen was die DA van die begin af duidelik oor sy standpunt wat BTW betref.
Hy sê die DA het nie een keer ‘n ander party, buite die RNE genader vir ondersteuning om teen die begroting te stem nie. Volgens hom het die ANC buite die RNE gewerk toe hy met ActionSA gepraat het oor die begroting.
