16 Augustus 2024
Die DA in die Johannesburg-metro sal nie vandag ‘n burgemeesterskandidaat steun nie, maar eerder weer vra dat die hele raad ontbind word.
Volgens die koukusleier, Belinda Kayser-Echeozonjoku, sal die inwoners van dié metro daarby baat dat ‘n nuwe raad verkies word eerder as om sy elfde burgemeester in agt jaar vandag te verkies.
Sy meen dat die 2021-plaaslike regeringsverkiesing ‘n uiters verdeelde uitslag tot gevolg gehad het wat daartoe lei dat onsuksesvolle koalisies herhaaldelik gevorm word om die stad te probeer regeer.
LEES OOK: Gwamanda blameer Herman Mashaba vir JHB se probleme
Volgens haar ly dienslewering daaronder en trek die stad se inwoners aan die kortste ent.
‘n Spesiale raadsvergadering is intussen vir vandag geskeduleer, met die oog op die verkiesing van ‘n nuwe burgemeester nadat Al Jama-ah se Kabelo Gwamanda vroeër dié week bedank het.
Na verwagting sal die nuwe ANC en ActionSA-koalisie die ANC-kandidaat, Dada Morero steun vir dié pos.
