23 Februarie 2023
Die ANC sekretaris-generaal Fikile Mbalula het te velde getrek teen Eskom se voormalige hoof, André de Ruyter en sê sy uitsprake oor ANC lede wat betrokke is by korrupsie by Eskom, is heeltemal onaanvaarbaar, en ’n lae hou na die ANC.
Mbalula het die media toegespreek na de Ruyter in ’n TV-onderhoud gesê het dat ANC politici by die Eskom trog vreet, en dat hy aan ’n minister vertel het dat ’n hoëvlak politikus hierby betrokke is.
LEES OOK: “DE RUYTER HET ESKOM IN ONEER GEBRING,” SÊ WOORDVOERDER
“Noudat de Ruyter op pad uit is, is hy besig om die blaam vir sy mislukkings te skuif na politici” sê Mbalula.
“Indien de Ruyter nie bewyse lewer van die bewering wat hy maak nie, sal ons regstappe teen hom neem. Hy moet bewys dat die ANC betrokke is by korrupsie by Eskom” het hy bygevoeg. Mbalula sê die ANC steun nie korrupsie nie, en “die ANC is nie korrup nie”, het hy gesê.
Mbalula wil ook weet hoekom De Ruyter nou eers die bewerings op die lappe bring, en dit nie al vroeër aan wetstoepassingsagentskappe aangemeld het nie.
LEES OOK: DE RUYTER AS HEDENDAAGSE HELD BESKRYF NÁ BEDANKING
De Ruyter het in die TV-onderhoud gesê dat hy die inligting oor korrupsie wél gedeel het met president Cyril Ramaphosa se adviseurs, sowel as met ’n minister.
Dit het blykbaar op dowe ore geval.
