25 April 2022
Die burgerregteorganisasie AfriForum en die openbaredeelnameplatform, DearSA is bekommerd oor die regering se hantering van die openbaredeelnameproses rakende kommentaar op die nuwe voorgestelde wysigings aan die gesondheidswet.
Dit kom nadat die gesondheidsdepartement na bewering nog net 15 000 openbare kommentare ontvang het.
LEES OOK: LUISTER: JOU VERGEETAGTIGHEID DALK “COVID-BREIN”
Die veldtogtebestuurder van AfriForum, Jacques Broodryk sê die organisasies betwis hierdie syfer aangesien hul meer as 310 000 kommentare deur hul amptelike openbaredeelnameplatforms ontvang het en al hierdie kommentaar direk aan die Departement van Gesondheid gestuur het.
Broodryk sê hierdie voorgestelde regulasies is uiters deurdringend en sal die gesondheidsdepartement toelaat om mense teen hul wil in kwarantynkampe te dwing en hulle ook te dwing om onder meer sekere mediese behandelings te ontvang.
LEES OOK: REGERING VERSNEL PROSES OM RAMPTOESTAND OP TE HEF
“Ons verwerk steeds die finale uitslae van ongeveer 283 000 kommentaar, maar voorlopige aanduidings toon dat meer as 95% van kommentaar die voorgestelde gesondheidswet-regulasies heeltemal verwerp. Van die res ondersteun 3% dit nie ten volle nie, terwyl slegs ongeveer 2% dit ondersteun,” sê Gideon Joubert, die uitvoerende hoof van DearSA.
