30 Augustus 2023
Die Solidariteit Skoleondersteuningsentrum sê die departement van onderwys in Gauteng probeer om deur middel van dreigbriewe plek in skole te skep wat nié bestaan nie en oor die afgelope 20 jaar nié deur die regering gebou is nie.
Die hoof van ontwikkeling by die SOS, Melanie Buys sê heelwat Afrikaanse en ander goeie skole in Gauteng het briewe van die departement ontvang waarin hulle gedruk word om tot soveel as 25% meer leerlinge te huisves as waarvoor hulle maksimum kapasiteit het.
Volgens Buys bring hierdie oorbevolking leerders se veiligheid in gedrang en benadeel dit veral die gehalte van onderrig wat aangebied word.
Sy meen hierdie dreigbriewe probeer jarelange wanprestasie van die departement toesmeer.
“Dit is ’n jaarlikse dilemma omdat die departement nie voldoende skole voorsien om aan die groeiende vraag in die provinsie te voldoen nie. Dit is kommerwekkend dat die provinsie miljarde rande wat deur die jare toegeken is om meer skole te bou, nie spandeer het om voldoende kapasiteit in skole te skep nie,” sê Buys.
Volgens Buys poog die onderwysdepartement nou om enkelmedium Afrikaanse skole wat reeds vol is met Afrikaanse leerders te dwing om vir Engelse leerders plek te maak. “Dit sal beteken dat Afrikaanse leerders plek moet afstaan aan Engelse leerders, wat bloot die probleem vergroot.”
