14 Julie 2022
Die vakbond Solidariteit sê hy sal voortgaan om Vrydag ‘n deel van die krygstuig-onderneming, DENEL, se bates op te veil.
Na verwagting sal dit die eerste van vele soortgelyke veilings wees wat die vakbond beplan.
Dit volg nadat Solidariteit vroeër vanjaar beslag gelê het op dié bates weens Denel se versuim om – ingevolge ʼn hofbevel – sowat R90-miljoen aan Solidariteit-lede oor te betaal vir agterstallige salarisse.
Solidariteit voer aan dat die beslaglegging en opveiling van bates nou die enigste opsie is nadat DENEL verskeie ooreenkomste tussen die partye verbreek het.
Helgard Cronjé, die adjunkhoofsekretaris vir die openbare sektor by Solidariteit, sê die veiling dek slegs ʼn baie klein gedeelte van die eis, maar dat hulle ook reeds op DENEL Korporatief se bankrekening beslag gelê het en dat verdere veilings sal volg totdat die volle bedrag ingewin is.
