‘n Debat oor oud-president Jacob Zuma se mediese verslae en parool het die eerste gedeelte van die oggend se sitting in die Hooggeregshof in Pietermaritzburgse oorheers, nadat die staat versoek het dat die betrokke verslae vandag ingedien word.
Hoewel Zuma se mediese parool nie ‘n direkte onderwerp van die korrupsieverhoor uitmaak nie, het regter Piet Koen toegegee dat dit moontlik ‘n invloed op die verloop van die saak kan hê.
Die staat wil hê dat die mediese rekords vir veilige bewaring aan die voorsittende beampte oorhandig moet word sou dit later nodig word om die verslae te bestudeer.
Die Kommissaris van Korrektiewe Dienste, Arthur Fraser, wat op omstrede wyse mediese parool aan Zuma toegestaan het was ook in die hof teenwoordig.
Die kwessie van die mediese verslae sal later weer bespreek word sodra die hof oor ‘n aansoek beslis het waarin die verdediging vra dat advokaat Billy Downer as aanklaer in die saak verwyder moet word.
