23 Februarie 2023
Reaksie stroom in nadat die uitvoerende hoof van Eskom, André de Ruyter se bedanking met onmiddellike ingang laat gisteraand aangekondig is.
Eskom het in ‘n verklaring gesê dat De Ruyter se bedanking kom nadat daar ‘n ooreenkoms tussen hom en die raad bereik is dat sy diensperiode teen 28 Februarie ten einde sal loop, maar dat hy nié die oorblywende periode hoef aan te bly nie.
Volgens ‘n verklaring sal sy opvolger aangewys word nadat daar met die betrokke minister en ander rolspelers beraadslag is.
De Ruyter se onmiddelike bedanking volg na ‘n onderhoud met Annika Larsen op eTV, waarin hy gesê het ’n hoëvlak-politikus was betrokke by korrupsie by Eskom – en dat ’n minister blykbaar daarvan geweet het.
Die bestuurshoof van Solidariteit, dr. Dirk Hermann het in reaksie op die nuus, De Ruyter as ‘n hedendaagse held beskryf. “Hy was in ‘n sisteem waar daar nie plek is vir harde werk, oplossings en eerlikheid nie. Eerlikheid was die finale strooi vir die korrupte stelsel. Dit word nie geduld nie en hy moet onmiddellik loop. Ek salueer vir Andrè.”
Die leier van Al Jama-Ah, Ganief Hendriks sê die bedanking is ‘n groot skok. Hy meen De Ruyter het sy oorhandiging van die pos eerder voor die media gedoen, as om die regte kanale te volg deur ‘n uitgangsonderhoud met ‘n onafhanklike menslike hulpbronnebeampte te doen.
“De Ruyter het egter die land ‘n reuse guns gedoen deur te bedank op die wyse waarop hy dit gedoen het.”
Ian Cameron, die woordvoerder van die burgerregteorganisasie Action Society het De Ruyter gesalueer en het hom as ‘n man van integriteit beskryf. Die hoof van AfriForum, Kallie Kriel sê dit is onaanvaarbaar dat De Ruyter nou op hierdie manier behandel word omdat hy gekies het om eerlik te wees oor korrupsie by Eskom.
FOTO: Annika Larsen, eTV.
