7 November 2024
‘n DA-raadslid in Aberdeen – in die Oos-Kaap – moes in dié dorp se landdroshof verskyn nadat hy ‘n kennisgewing ontvang het dat hy strepe op die dorp se paaie verf sonder dat hy toestemming gehad het.
Volgens Eldridge Ruiters is die saak teen hom ter syde gestel omdat die landdros nie die munisipale ordonansie kon kry waarop die klag teen hom aanhangig gemaak is nie. Ruiters het erken dat hy padtekens en strepe – wat jare laas deur die Dr Beyers Naudé-plaaslike munisipaliteit geverf is – oorgeverf het met verf wat sy party gekoop het.
Terwyl verskeie ander munisipaliteite in die land verordeninge het wat die verf van padmerke sonder die munisipaliteit se toestemming verbied, is dit nie duidelik dat dit in Aberdeen die geval is nie.
‘n Woordvoerder van die nasionale vervolgingsgesag in die Oos-Kaap, Luxolo Tyali, het vroeër gesê dat dit nie ‘n onbenullige saak is nie en dat dit ernstige gevolge kan inhou as enige iemand toegelaat word om onduidelike padtekens oor te verf.
Foto: Graaff-Reinet Advertiser
