13 November 2023
Die DA gaan die Openbare Beskermer versoek om ondersoek in te stel na die buitensporige uitgawes vir spyseniering aan boord van president Cyril Ramaphosa se presidensiële straler, Inkwazi.
Rapport het gister berig het hoe BBP’s op Inkwazi teen ’n koste van sowat R24 000 per kop gesmul het toe hulle verlede jaar teruggevlieg het na Suid-Afrika ná die begrafnis van koningin Elizabeth II.
Volgens die berig smokkel die presidensieële BBP’s ook sommer oortollige kos en drank in hul bagasie uit.
Die DA sê duisende gewone Suid-Afrikaners word aan hul lot oorgelaat om van erge hongerte en wanvoeding te sterf, terwyl die president en sy BBP’s hulle skuldig maak aan reis-vraatsugtigheid.
Volgens die woordvoerder in die presidensie, Vincent Magwenya, het die presidensie nie enige beheer oor die kos en drank wat aan boord van Inkwazi bedien word nie en is dit glo in die hande van die lugmag en BBP-eskader en -kombuis.
