3 Junie 2021
Die DA sal vandag strafregtelike klagte teen die minister van gesondheid, dr. Zweli Mkhize aanhangig maak.
Die party sê ‘n strafregtelike ondersoek moet volg, en dat Mkhize nie vertrou kan word met die Covid-19 inentingsprogram, terwyl daar bewerings van bedrog en korrupsie oor sy kop hang nie.
LEES OOK: SOE: VERSLAG OOR BEWEERDE KORRUPSIE IN JUNIE GEREED
Die DA sê Mkhize en die direkteur-generaal van gesondheid Sandile Buthelezi, het verskeie korrupte wandade gepleeg, in die toekenning van die R150-miljoen kontrak aan Digital Vibes.
Mkhize het erken dat die kontrak onreëlmatig was, maar meen hy het nié daarby gebaat nie. Dit het ook gister aan die lig gekom dat Mkhize se seun, Dedani na bewering ‘n tweedehandse Toyota Land Cruiser-bakkie by Digital Vibes gekry het.
Die Spesiale Ondersoek-eenheid het gister gesê dat die ondersoek na die kontrak in ‘n kritieke fase is.
LEES OOK: ZWELI MKHIZE SE SEUN ONTVANG GLO ‘N BAKKIE BY OMSTREDE MAATSKAPPY
Volgens die hoof van die SOE, Andy Mothibi gee Mkhize sy volle samewerking. Hy verwag dat die verslag voor die einde van die maand voltooi sal wees.
