25 Augustus 2023
Die DA-leier, John Steenhuisen, sê Suid-Afrika polisieer nog op ‘n Victoriaanse verouderde manier en het nie bygehou met moderne polisiëringstegnieke of die polisiewetenskap nie.
Hy het boere in Jan Kempdorp, in die Noord-Kaap toegespreek, nadat boere hul misnoeë uitgespreek het oor die gesloer in die polisie se ondersoek na plaasaanvalle in dié streek.
‘n Plaaslike boer het aan Steenhuisen genoem dat die polisie onder beman is en dat hul toerusting soos vinger-afdrukmasjiene nie werk nie. Hy sê die boere het soms self al die nodige inligting nog voordat die polisie dit kan bekom, maar niks word hieraan gedoen nie.
Steenhuisen meen daar moet gefokus word om die polisiegesag af te wentel, die standaarde tot ‘n moderne vlak te verhoog en suksesvolle tegnieke van oor die wêreld heen in te span.
