Die Grondwethof het die DA se aansoek om die Onafhanklike Verkiesingskommissie, die OVK, se besluit om die proses vir politieke partye om hul kandidate vir die komende plaaslikeregeringsverkiesing te heropen, ongrondwetlik, onwettig en ongeldig te verklaar, van die hand gewys.
Die hof het dus beslis dat die OVK se besluit grondwetlik, wettig en geldig is.
Die DA was van die standpunt dat die OVK onregmatig opgetree het deur die registrasie van kandidate toe te laat, nadat die Grondwethof beslis het dat die OVK nie die plaaslikeregeringsverkiesing tot aanstaande jaar mag uitstel nie.
Die registrasie van kandidate was in omstredenheid gehul, nadat die ANC aanvanklik nie daarin kon slaag om honderde kandidate te registreer nie. Indien die hof beslis het dat die besluit wel ongeldig was, sou die ANC in 12 munisipaliteite uitgeknikker geword het.
Die regerende party asook al die ander politieke partye het dus nou tyd tot môre om 17:00 om hul kandidaatlyste by die OVK in te dien.
Die DA het intussen aangekondig dat hy die media later vandag sal toespreek oor die uitspraak.
Fotokrediet: Darren Stewart / Gallo Images
