23 Februarie 2024
Die DA het bykomende en opvolgaksie aangekondig wat deel vorm van sy voortgesette veldtog om moontlike korrupsie weens kaderontplooiing deur die ANC bloot te lê.
Die leier van dié party, John Steenhuisen sê hulle wil die momentum gebruik wat hul onlangse oorwinning in die Grondwethof geskep het en voortbou op dié sukses.
Hy sê die DA sal voortgaan met ‘n minagtingshofaansoek teen die ANC om afskrifte te bekom van die e-pos- en WhatsApp-boodskappe wat op dié komitee betrekking het vir die tydperk toe president Cyril Ramaphosa, as voorsitter van die ANC se kaderontplooiingskomitee diens gedoen het.
Volgens Steenhuisen was dit in dié tydperk wat staatskaping hoogty gevier het.
Hy sê daar sal ook vandag ‘n aansoek by die Noord-Gautengse hooggeregshof in Pretoria ingedien word om teen Dinsdag se uitspraak te appelleer.
In dié uitspraak het die hof die party se aansoek – om die ANC se kaderontplooiingsbeleid ongrondwetlik te verklaar – met koste van die hand gewys.
