17 Januarie 2024
Die DA het ‘n skrywe gerig aan die Internasionale Krieketraad, om vas te stel of Krieket Suid-Afrika (KSA) hulle ingelig het oor moontlike veiligheidskwessies tydens die o.19 Krieketwêreldbeker, wat die week in Suid Afrika begin.
KSA het die veiligheidskwessies voorgehou as die rede waarom hy die kapteinskap van David Teeger ontneem het.
Die DA hou egter vol dat die besluit eerder weens politieke druk van die ANC geneem is, oor uitsprake wat Teeger gemaak het ter ondersteuning van soldate in Israel.
LEES OOK: O. 19-KRIEKETTOERNOOI MAG IN SA VOORTGAAN NÁ KAPTEIN SE UITLATINGS
Die party se woordvoerder oor sport, Veronica van Dyk sê die Internasionale Krieketraad moet ook ondersoek instel na politieke inmenging by Krieket Suid Afrika.
Die Internasionale Krieketraad het gister (16 Januarie) aangekondig dat Suid-Afrika kan voortgaan met sy aanbieding van die o. 19-wêreldbekertoernooi – wat Vrydag in Potchefstroom en Bloemfontein begin.
KSA het Sondag vir Juan James in Teeger se plek aangestel nadat Teeger in Oktober sy steun aan die Israelse weermag toegesê het in die voortslepende konflik met die Palestyne in Gaza.
