14 Januarie 2022
Die minister van gesondheid, dr. Joe Phaahla sê dit blyk asof die omikron-variant van die Covid-19-virus mense met ligter simptome laat.
Hy hou vanoggend ‘n mediakonferensie oor die huidige Covid-19-situasie in die land. Volgens hom word ouer mense, mense met onderliggende siektestoestande en diegene wat nie ingeënt is nie, egter nogsteeds ernstig siek weens die omikron-variant.
Volgens Phaahla is sy departement bly om te sien dat die aantal nuwe infeksies ook besig is om af te neem, terwyl minder mense in die hospitaal opgeneem word as tydens die vorige vlaag.
Hy het ook uitgebrei oor die aantal inentings en meen dit het tydens die feesseisoen nie goed gegaan met die regering se inentingsprogram nie. Pogings om mense by tolhekke in te ent, was ook nie ‘n groot sukses nie.
28,8-miljoen inentings is aan 18,4-miljoen volwassenes toegedien. Hy sê net meer as 1-miljoen dosisse is aan die ouderdomsgroep tussen 12- en 18 jaar oud toegedien.
