21 Desember 2021
Die vakverbond Cosatu het die voorgestelde wysigings aan die nasionale minimum loon verwelkom, waaruit huiswerkers die meeste sal voordeel trek.
Die Nasionale Minimumloonkommissie het voorgestel dat die minimum loon met inflasie plus een persent verhoog moet word.
Die kommissie hersien elke jaar die minimum loon en vanjaar het hy voorgestel dat dié loon vir huiswerkers gelyk gemaak word met die nasionale minimum loon in 2022.
Dit beteken dat huiswerkers se minimum salaris van R19,09 na R23 per uur verhoog sal word wat neerkom op ’n 21 %-verhoging. ’n Huiswerker wat tans R3 360 vir ’n 8-ure skof oor 22 dae betaal word sal moontlik aanstaande jaar R4 063 huis toe kan neem.
Ander werkers se loon sal dan van R21,69 tot R23 per uur styg.
Cosatu meen dat dit ’n positiewe verskil in meer as ses miljoen werkers se lewens sal teweegbring, veral vir die 892 000 huiswerkers.
Die vakverbond sê hy wil sien dat die wysigings gou ingestel sal word.
Die wysigings moet egter nog deur die departement van indiensneming en arbeid goedgekeur word. Die departement nooi die publiek uit om teen 14 Januarie 2022 op die voorstelle te reageer.
Fotokrediet: workability.co.za
