23 Desember 2021
Agt maande nadat gedeeltes van die Charlotte Maxeke Akademiese Hospitaal in Johannesburg deur ‘n brand beskadig is, het senior medici van die hospitaal ‘n beroep op die regering gedoen om die nodige herstelwerk te doen, sodat die hospitaal weer ál sy werksaamhede kan hervat.
Die hospitaal se hoof van interne geneeskunde, prof. Adam Mohamed, sê ‘n skrywe wat hy aan die betrokke ministerie en die presidensie gerig het, bly onbeantwoord.
Volgens prof. Mohamed wil dit voorkom asof daar gewag word vir die nuwe begroting voordat daar daadwerklike pogings aangewend gaan word om die hospitaal – wat tans ongeveer 40% in bedryf is – te herstel.
Prof. Mohamed het ook sy kommer uitgespreek dat die departement slegs op Covid-19 fokus, terwyl onkologie-pasiënte tussen 3 en 5 maande moet wag vir behandeling.
Hy sê die funksionaliteit van die hospitaal – wat onder meer die enigste kardio-toraks hoësorgeenheid in die suide van Gauteng bedryf – beïnvloed ook gesondheidswerkers in die res van die provinsie aangesien dié hospitaal se pasiënte nou by ander geriewe behandel moet word.
Fotokrediet: Google Maps
