29 Junie 2021
Die ministers in die Nasionale koronavirusbevelsraad het vanoggend die media toegespreek na aanleiding van die aangepaste inperkingsmaatreëls, wat Sondagaand deur president Cyril Ramaphosa aangekondig is.
Die minister van polisie, Bheki Cele het benadruk dat enige persoon in hegtenis geneem sal word en sal ‘n kriminele rekord hê indien hulle nié die regulasies gehoorsaam nie.
LEES OOK: FAMILIE VERGADERING: AANGEPASTE VLAK 4 INGESTEL
Hy sê mense kan ‘n boete opgelê word of gevangenisstraf in die gesig staar.
Luidens dié aangepaste regulasies mag geen persone Gauteng binnekom of uitgaan nie tensy dit vir werkdoeleindes of begrafnisse is. Meer as 60% van die huidige Covid-19 gevalle is in Gauteng.
Volgens Cele is daar oral padblokkades in Gauteng om seker te maak dat geen persone vir ontspanningsdoeleindes die provinsie verlaat of binnekom nie.
“Almal wat Gauteng binnekom en verlaat, moet ’n permit hê.”
Die minister van vervoer, Fikile Mbalula sê luidens vlak 4-inperkingsregulasies word die vervoer van alkohol verbied, behalwe vir kommersiële vervoer, soos vir uitvoer en die vervaardiging van handreinigermiddels.
LEES OOK: OPPOSISIEPARTYE VEROORDEEL INPERKINGSREGULASIES
Hy sê kommersiële hawens is steeds oop en die huidige regulasies oor internasionale reise bly in plek.
