30 Augustus 2023
Die leier van die VF Plus, Dr. Pieter Groenewald sê die minister van polisie, Bheki Cele, het ʼn wysigingswetsontwerp op die Onafhanklike Polisie-ondersoekdirektoraat, Opod, by die parlement ingedien – nadat dit reeds deur die staat se regsadviseur as ongrondwetlik bestempel is.
Die wysiging handel oor die aanstelling van Opod se uitvoerende direkteur en is daarop gemik om die minister van polisie en die kabinet die mag te gee om dié aanstelling te doen.
Groenewald sê ’n onafhanklike regsmening wat die minister hieroor bekom het, beaam die mening van die staat se regsadviseur en ʼn Grondwethof-uitspraak het dit ook duidelik gemaak dat die aanstellingsproses onpartydig en onafhanklik moet wees.
Hy sê die minister is met sy optrede besig om amptenare te intimideer en te manipuleer, om te verseker dat hy meer mag oor Opod kan verkry.
