2 Julie 2021
Die woordvoerder van die Umkhonto we Sizwe- militêreveteranevereniging (MKMVA) en ‘n vertroueling van oud-president Jacob Zuma, Carl Niehaus sê “vandeesweek was een van die mees tragiese weke in die geskiedenis van Suid-Afrika.”
Niehaus het vroeër vanmiddag by Zuma se woning in Nkandla aangekom waar hy ‘n mediakonferensie gehou het oor die oud-president se skuldigbevinding en vonnis van 15 maande gevangenisstraf.
LEES OOK: ZUMA DOEN GLO AANSOEK DAT HOFUITSPRAAK HERROEP WORD
Die Grondwethof het bevind dat Zuma skuldig is aan minagting van die hof nadat hy geweier het om – ondanks ‘n hofbevel – voor die staatskapingskommissie te getuig. Hy het tot Sondag kans om homself aan die polisie oor te gee, om met sy vonnis te begin.
Niehaus sê baie kamerade landwyd het hul woede en hartseer uitgespreek oor wat dié week gebeur het.
Hy meen “Zuma word al vir die afgelope 22 jaar polities vervolg deur die nasionale vervolgingsgesag en sommige kamerade in die ANC en dat hy wééreens vandeesweek verneder is.”
LEES OOK: JACOB ZUMA SÊ HY HET “NIE DIE GRONDWETHOF AANGEVAL NIE”
Volgens hom word Zuma deur die staatskapingskommissie geteiken en was regter Sisi Khampepe se uitspraak vandeesweek ‘n bespotting van geregtigheid.
Niehaus het benadruk dat die oud-president se ondersteuners nié sal toelaat dat Zuma tronk toe gaan nie en sal ‘n “menslike ketting om hom vorm indien dit nodig is.”
Intussen het daar luidens berigte op Twitter chaos tussen joernaliste en die MKMVA-veterane ontstaan nadat Niehaus gevra is oor die Covid-19 inperkingsregulasies, wat glo verontagsaam is.
LEES OOK: ZONDO REAGEER OP HOFUITSPRAAK OOR JACOB ZUMA
Dit is toe dat die veterane die media glo begin intimideer het. Joernaliste het gevolglik besluit om nie meer dekking aan die geleentheid te bied nie.
