“Byvoordele van R230-miljoen vir veiligheidswagte bedreig die Tshwane-metro se begroting”

Die VF Plus het tydens ʼn raadsvergadering van die Tshwane-metro ʼn verslag verwerp waarin sowat R230-miljoen oor drie jaar bewillig word om meer as ʼn duisend gekontrakteerde veiligheidswagte van byvoordele te voorsien.

‘n VF Plus-raadslid in die metro, Grandi Theunissen sê dié 1283 wagte is in 2021 sonder enige byvoordele aangestel.

Theunissen sê hy het in die raadsvergadering voorgestel dat ‘n ondersoek gedoen moet word om vas te stel of die veiligheidswagte aan die nodige vereistes voldoen en in watter mate tegnologie ingespan kan word om sekere take te verrig.

Theunissen sê die VF Plus is nie hoopvol dat die Tshwane-metro se begroting die bykomende koste vir die  veiligheidswagte sal kan dek nie.

Hy sê hierdie verslag vorm deel van die ActionSA/ANC/EFF-koalisie se pogings om hul beleid van algemene inkontraktering van veiligheidswagte en skoonmakers deur te dwing.

“Verantwoordelike besluitneming oor munisipale fondse is nie bloot ‘n wetlike vereiste nie, maar ‘n saak van uiterste belang. Sonder ʼn deeglike evaluering van die volle impak, kan geen sinvolle besluit geneem word nie en dit sal waarskynlik lei tot vrugtelose en vermorste besteding.”