7 Februarie 2024
Die burgerregteorganisasie AfriForum sê hy is bewus van ’n groot byeenkoms wat deur politieke partye in Groblersdal beplan word, terwyl die hofsaak van die 63-jarige Piet Groenewald en sy 27-jarige stiefseun, Stephan Greeff in die hof voortgesit word.
Hulle word daarvan aangekla dat hulle ‘n werknemer van Groenewald se veiligheidsmaatskappy, Veneruru Kavari aangerand het, en ‘n hond op hom losgelaat het.
Volgens Llewelynn Hemmens, AfriForum se hoof van Veiligheid vir die Noordstreek, is die organisasie se gemeenskapsveiligheidstrukture reeds in Groblersdal om die veiligheid van die gemeenskap te verseker en om moontlike teikens soos skole en aftreeoorde, en kwesbare gemeenskapslede te midde van die toenemende spanning te beskerm.
Verskeie politieke partye, insluitend die EFF, en sy lid Carl Niehaus het weer vanoggend buite die hof saamgedrom. Hulle eis dat die twee mans nie op parool vrygelaat word nie.
Hemmens sê AfriForum is in gesprek met die plaaslike polisie en sal verseker dat die organisasie se teenwoordigheid hier, binne die raamwerk van die wet, ’n stabiliserende uitwerking het.
