6 Julie 2022
Die handelsmerk, Buffelsfontein het in ‘n mediaverklaring op sy Facebook-blad gesê dat dit onder sy aandag gekom het dat “sekere persone ‘n doelbewuste veldtog op sosiale media en in die media begin het om Buffelsfontein se reputasie, handelsmerk en produkte skade aan te doen deur dit in die publiek te belaster.”
Dit kom nadat verskeie valse aantygings na bewering gemaak is oor die oorsprong, uniekheid en kwaliteit van die maatskappy se produkte, spesifiek Buffelsfontein Lager.
“Buffelsfonteinprodukte is uniek en word spesifiek na gelang van ons instruksies vervaardig. Dit sluit spesifiek Buffelsfontein Lager in.”
Die maatskappy sê verder die feit dat Buffelsfontein Lager by ooreenkoms deur ‘n betroubare vervaardiger gebrou word, beteken nie dat dit dieselfde inhoud as daardie vervaardiger se ander produkte het nie.
“Alhoewel ons op hierdie stadium slegs kan spekuleer oor die redes vir hierdie aanval teen ons, blyk dat die veldtog vanuit ‘n dispuut tussen die persoon/e en derdepartye spruit. Verskeie stellings wat duidelik op verkeerde inligting en hoorsê gebaseer word, word nou as ‘feite’ versprei.”
Buffelsfontein is tans besig met gesprekke met sy regspan oor hulle volgende stappe. “As gevolg van die uitermatige kwaadwillige aanval word verdere regstappe tans oorweeg.”
