10 Februarie 2023
Die Lughawensmaatskappy van Suid-Afrika, Acsa sê die oorsaak van ‘n Britse toeris se dood by die OR Tambo Internasionale Lughawe in Johannesburg word tans ondersoek.
Die uitvoerende hoof van Acsa, Mpumi Mpofu sê die toeris, Michael Joseph Morris het in ‘n badkamer by die lughawe inmekaargesak nét nadat hy en sy vrou in Johannesburg vanaf Londen geland het.
Paramedici het hom op die toneel dood verklaar.
‘n Amptenaar van die Britse ambassade, wat in dieselfde vlug as Morris was, het Morris se gesin gehelp om die voorval aan te meld. Morris se familie sal na verwagting vandag terugkeer na Londen.
Die uitvoerende hoof van Acsa, Mpumi Mpofu, het intussen haar medelye aan Morris se naasbestaandes betuig.
