8 Junie 2023
Suid-Afrika sal steeds gasheer speel vir die Brics-beraad wat beplan word vir Augustus.
Die minister in die presidensie Khumbudzo Ntshavheni het vandag gesê die kabinet wag nog om terugvoer te ontvang van die Interministerieële Komitee wat moet beraadslaag oor die Russiese president Wladimir Poetin se beoogde besoek aan Suid-Afrika vir die Brics-beraad.
“Sodra die komitee se werk voltooi word, sal daar ‘n aankondiging gemaak word, maar soos sake nou staan, sal ons steeds gasheer speel vir die Brics-beraad,” het Ntshavheni gesê. Adjunk-president Paul Mashatile is aangewys as voorsitter van die komitee.
Ntshaveni wou nie uitwy oor wanneer die komitee sy werk sal voltooi nie.
Oor of die land uitvoering sal gee aan die Internasionale Strafhof se lasbrief vir inhegtenisneming van president Poetin, het Ntshaveni gesê almal wat die beraad sal bywoon, sal as gaste van die land hanteer word.
“Rusland het gesê dit sal ‘n oorlogsverklaring wees as Putin in hegtenis geneem word. Ek dink nie die land kan bekostig om oorlog te verklaar teen Rusland nie” het die minister bygevoeg.
