22 Junie 2021
Die twee verdagtes, wat daarvan beskuldig word dat hulle die plaasvoorman, Brendin Horner (21) in Oktober verlede jaar op die Bloukruinboerdery in Paul Roux in die Vrystaat vermoor het, sal vandag weer in Senekal landdroshof verskyn vir hulle borgtog-aansoek.
LEES OOK: BRENDIN HORNER: SAAK WEER UITGESTEL
Sekwetje Mahlamba (32) en Sekola Matlaletsa (44) se aansoek om borg kom nadat DNS-uitslae hulle glo nie op die toneel kon plaas nie.
Die DNS is van bloed, wat op ‘n broek van Mahlamba gevind is. Dié broek is tydens sy inhegtenisname in ‘n vrieskas in sy huis gevind.
Mahlamba is kort na die moord borgtog geweier, terwyl Matlaletsa aanvanklik borgtog toegestaan is. Hy is egter enkele dae later weer in hegtenis geneem in verband met ‘n beweerde veediefstal-saak.
Die verdagtes se regsverteenwoordiger wil hê dat hulle op borgtog vrygelaat moet word voordat die saak na die hoogeregshof se rondgaande hof in Bethlehem oorgeplaas word.
