23 Junie 2021
Die twee verdagtes, wat tereg staan op klagtes van die moord verlede jaar op die plaasvoorman van Paul Roux in die Vrystaat, Brendin Horner (21), is altwee op borgtog vrygelaat.
Sekwetje Mahlamba (32) en Sekola Matlaletsa (44) het gister in die landdroshof in Senekal verskyn.
Die hof het ook gister gehoor dat Horner moontlik eerder op 1 Oktober 2020 tussen 19:00 en 20:00 vermoor is, as in die vroeë oggendure van 2 Oktober – soos wat die polisie aanvanklik vermoed het.
Die DNS uitslae – van bloed op Mahlamba se broek – kon ook glo nie die twee op die toneel plaas nie.
Mahlamba is op borgtog van R 5000 vrygelaat. Dit is die eerste keer sedert die moord dat hy op borgtog vrygelaat is.
LEES OOK: BRENDIN HORNER: TWEE VERDAGTES TERUG IN DIE HOF
Die staat se aansoek dat Matlaletsa se borgtog terug getrek moet word, is ook van die hand gewys en gevolglik is hy wéér op borgtog vrygelaat. Hy is in Oktober borg toegestaan, maar is enkele dae later weer in hegtenis geneem weens ‘n ander voorval.
Beide Mahlamba en Matlaletsa het onskuldig gepleit.
As deel van die twee se borgtogvoorwaardes moet hul drie keer per week by die polisiestasie op Paul Roux aanmeld.
Die saak is uitgestel tot 23 Augustus, wanneer die voor-verhoor in die rondgaande hof van die hooggeregshof sal voortduur.
