19 Januarie 2023
Die VF Plus het die Gautengse provinsiale polisiekommissaris van polisie, luitenant-generaal Elias Mawela, genader om gryp-en-breek-voorvalle – wat tans deel vorm van diefstal uit motorvoertuie in die polisie se misdaadstatistiek – van mekaar te skei.
Volgens die party se Kobus Hoffman beteken diefstal uit motorvoertuie dat daar geen persoon in die voertuig teenwoordig was toe die misdaad plaasgevind het nie, terwyl met breek-en-gryp-voorvalle die persoon teenwoordig is in die voertuig en in vele gevalle is ʼn wapen betrokke.
Hy sê daar is dus ʼn duidelike onderskeid tussen die twee misdade en dit behoort nie saamgevoeg te word nie. “Breek-en-gryp-voorvalle is ʼn ernstige misdaad en kan lewensverlies of ernstige beserings meebring,” sê Hoffman.
Hoffman is ook van mening waar daar ʼn hoë voorkoms van breek-en-gryp-voorvalle is, moet sigbare polisiëring ook verskerp word en waarskuwingstekens opgerig word.
Foto: Solesafe Window Film
