28 September 2021
Die VF Plus sê die weghol veldbrande in die Noord-Kaap behoort deeglik ondersoek te word.
Die VF Plus-LP en provinsiale leier in Noord-Kaap, dr. Wynand Boshoff sê in die dorre Noord-Kaap provinsie is daar gewoonlik te min gras om ernstige veldbrande te voed, maar meen hierdie jaar is anders weens goeie najaarsreën.
Volgens hom bestaan die vraag egter of dit net die gevolg van natuurlike oorsake is en of brandstigting betrokke is. Die VF Plus versoek daarom die polisie om ‘n deurtastende ondersoek hieroor te doen met die hulp van georganiseerde landbou en ander organisasies wat grondeienaars met veiligheidsake help.
Hy sê die N12- en N8-paaie moes ook by tye gesluit word.
“Daar word uitgebreid oor die afgelope dae se brande verslag gedoen aangesien dit die provinsiale hoofstad, Kimberley, aan drie kante omring het.”
Boshoff meen hoewel die landbougemeenskap en selfs ander mense wat glad nie boer nie, goed georganiseerd is, is dit onmoontlik om die duisende kilometer veld wat aan paaie grens, te bewaak, en misdadige elemente weet dit.
“Daarom is dit noodsaaklik dat die polisie alle beskikbare bronne gebruik om vas te stel wat besig is om te gebeur. Dit sluit inligting van informante in, maar ook beeldmateriaal van private veiligheidstrukture op plase,” sluit Boshoff af.
Stem vir die Aitsa’s
