23 Januarie 2022
Die Nooddienste in dele van die Wes-Kaap moes reeds sedert gisteroggend poog om brande te midde van die hittegolf onder bedwang te probeer bring.
Die Kaapse Wynland Distriksmunisipaliteit se woordvoerder, Joanne Otto het vanoggend in ‘n verklaring gesê dat die brand in Pêrelvallei in die Paarl grootliks onder beheer gebring is, maar die digte plantegroei, waarvan die meeste nog smeul, veroorsaak baie rook.
Sy sê indien die wind weer opsteek kan die brand weer opvlam.
In die Robertsonvallei is ‘n brand laat gistermiddag deur weerlig veroorsaak. Otto sê hierdie brand wek kommer weens die nabygeleë eiendom en boorde. Sy sê die brandweer sal die situasie deur die loop van die dag dophou en nog hulpbronne sal ingespan word indien nodig.
Die brande in Bainskloof en omliggende gebiede is volgens Otto onder beheer gebring en brandbestryders kon afstaan. Sy sê die brandweer sal egter deur die loop van die dag op ‘n hoë gereedheidsgrondslag wees weens nóg hoë temperature wat vir vandag voorspel word en dus nog brande kan veroorsaak.
