12 Desember 2023
Die VF Plus sê in die lig van die sestien dae van aktivisme teen vroue en kinders het die regstelsel Suid-Afrika se vroue en kinders weer in die steek gelaat.
Dít kom nadat borgtog van R15 000 toegestaan is aan ‘n onderwyser van Mosselbaai, wat in hegtenis geneem is in verband met negentien aanklagte van verkragting, seksuele aanranding en seksuele voorbereiding van minderjariges.
Volgens die VF Plus se provinsiale woordvoerder in die Wes-Kaap, advokaat Lennit Max het die verdagte in die hof aangevoer dat hy op borgtog vrygelaat kan word omdat hy nie ʼn selfdoodrisiko is nie aangesien dit volgens hom ʼn “sonde” is.
Max meen dit dui ooglopend op die persoon se gebrek aan onderskeiding tussen wat sonde is aangesien dit ook verkeerd is om seksuele dade met minderjariges te pleeg. Hy sê ‘n geringe borgtogbedrag soos in dié geval stuur ‘n duidelike boodskap dat geweld teen vroue en kinders nie uitgeroei sal word nie.
“Vermeende oortreders sal beswaarlik afgeskrik word wanneer straf of borgtogvoorwaardes niks meer as ʼn raps oor die vingers is nie.”
Hy sê alhoewel die VF Plus staan by die beginsel dat iemand onskuldig is totdat hy of sy skuldig bevind word, glo die party dat strawwe en borgtogvoorwaarwaardes in hierdie soort sake so swaar as moontlik moet wees.
