23 Februarie 2022
Die Noord-Gautengse hooggeregshof in Pretoria het die Zondo-kommissie van ondersoek na staatskaping se aansoek toegestaan en hom nóg twee maande kans gegee om sy werk af te handel.
President Cyril Ramaphosa is ook ‘n bykomende vier maande gegee om te reageer op die kommissie se verslag en om die bevindinge in die parlement voor te lê.
Die derde en finale deel van die kommissie se verslag moes teen einde Februarie aan die president oorhandig word. Volgens die voorsitter van die kommissie, advokaat Raymond Zondo is dié deel van die verslag 1500 bladsye lank en bevat bevindinge oor onder meer die nasionale tesourie en die Passasierspooragentskap.
Hy het in sy hofstukke aangevoer dat die finale verslag egter nié die totale verslag sal voltooi nie en dat daar steeds werk is wat gedoen moet word. Die finale deel sal nou op 30 April aan die president oorhandig word.
