10 Mei 2022
Gemeenskapslede in die Madibeng-plaaslike munisipaliteit in Brits, Noordwes hou tans werknemers, raadslede en lede van die publiek gyselaar glo weens ontevredenheid met onder meer ‘n gebrek aan lae-kostebehuising en die begroting wat ter tafel gelê is.
‘n Werknemer van die munisipaliteit, Philip Jessen het Pretoria FM ingelig dat die deure van die munisipale gebou omstreeks 14:00 vanmiddag gesluit is, met al die werknemers steeds binne die gebou.
‘n VF Plus-raadslid wat tans ook gyselaar gehou word, Lardus Klopper sê ‘n klein groepie gemeenskapslede het 13:45 buite die gebou betoog, waarna hulle die gebou wou bestorm. Hy sê die situasie is redelik kalm, maar buite is daar ongeveer 200 mense wat eis om met die munisipale bestuur te vergader.
Nog ‘n VF Plus-raadslid, wat nie binne die gebou is nie, Elsa Lourens sê polisiebeamptes en veiligheidswagte is tans op die toneel. Sy sê die situasie blyk om onder beheer te wees, maar meen die polisie moes vinnig inspring toe gemeenskapslede die deur na die gebou wou afbreek.
