16 Maart 2024
Die aktrise, Julie Strijdom is omstreeks 15:00 vanmiddag in die ouderdom van 79 oorlede na ‘n kort siekbed.
Die TV-regisseur en vriendin, Magriet van Loggerenberg het die nuus op haar Facebook-blad bevestig. Ook haar suster, Linda Erwee het die nuus aan Maroela Media bekend gemaak.
Volgens Erwee is haar suster weens nierversaking in ‘n hospitaal in Pretoria oorlede, nadat sy drie weke gelede daar opgeneem is. Sy sou in Julie vanjaar haar tagtigste verjaarsdag gevier het.
Strijdom was tot onlangs in Binnelanders te sien as die geliefde tannie Breggie. Sy was ook bekend vir haar rol as Lady Di Roos in die rolprent, Knysna en was ook te sien in Lien se Lankstaanskoene.
Germandt Geldenhuys, bekend as Louis in Binnelanders het op sy Facebook-blad geskryf dat dit ‘n voorreg was om vir tannie Julie te ken. “Dankie dat tannie vir ons almal op stel soos ‘n regte, liefdevolle “ouma” was.”
Nog ‘n Binnelanders-bekende, Hannelie Warren, wat die rol van Ilse vertolk het sê niemand sal ooit die nimlike tannie Breggie van Binnelanders kan vergeet nie. “Julie het diep spore in die bedryf getrap en op haar dag, was sy ook ‘n regisseur van formaat vir die destydse SAUK.”
