20 Oktober 2021
Die Biervereniging van Suid -Afrika (BASA) sê hulle is bekommerd dat die regering wéér, sonder enige waarskuwing, ‘n verbod op die verkoop van drank kan instel, sonder enige wetenskaplike bewyse.
Dit kom nadat die minister van polisie, Bheki Cele vroeër gesê dat hy die Nasionale Koronavirusbevelsraad genader het om te oorweeg om die verkope van drank op 1 November te verbied, wanneer die munisipale verkiesing plaasvind. Die uitvoerende hoof van BASA, Patricia Pillay sê Cele se onlangse uitlating wek kommer dat drank weer nie verkoop sal kan word nie, veral gegewe ‘n vierde Covid-19-vlaag wat in Desember verwag word.
Volgens Pillay het BASA ‘n dringende skrywe aan die minister van handel, nywerheid en mededinging, Ebrahim Patel gerig waarin hulle vra dat hy dringend moet ingryp om te sorg “dat ‘n onredelike verbod nie weer op drankverkope ingestel word nie.”
Sy sê dit is veral belangrik dat geen verbod oor die feesseisoen geld nie omdat dit ‘n belangrike tyd vir die drankbedryf is.
“Tydens die vorige vier keer wat drank nie verkoop kon word nie, het die bedryf ‘n totaal van 161 dae van handel verloor, wat ongeveer 240 000 mense se poste in gedrang geplaas het.”
Stem vir die Aitsa’s
