6 Julie 2021
Die minister van polisie, Bheki Cele en die nasionale polisiekommissaris, Khela Sitole het die Grondwethof glo skriftelik in kennis gestel dat hulle nie nou al vir oud-president Jacob Zuma in hegtenis gaan neem nie, hangende die twee hofaansoeke wat Zuma gebring het om sy vonnis te hersien.
Cele het in ‘n brief aan die grondwethof gesê dat hy sal wag vir die regsaksie om sy gang te gaan, behalwe as die Grondwethof anders besluit.
LEES OOK: ZONDO: “ZUMA MISBRUIK HOWE”
Indien die hof voel dat daar wel gehoor gegee moet word aan die bevel dat Zuma binne die volgende twee dae deur die polisie in hegtenis geneem moet word, het Cele gesê die polisie is reg om Zuma teen môre in hegtenis te neem, sodat hy sy 15 maande gevangenisstraf kan uitdien.
Die oud-president se eerste hofaansoek word vandag in die hoogeregshof in Pietermaritzburg aangehoor.
LEES OOK: ZUMA: “EK IS NIE BANG OM TRONK TOE TE GAAN NIE”
Verder het Zuma ook die Grondwethof genader om sy skuldigbevinding van minagting van die hof en gepaardgaande vonnis te heroorweeg en te herroep. Dié saak word op 12 Julie aangehoor.
