20 Februarie 2023
Eskom se uitvoerende hoof, André de Ruyter sê hy kan steeds met redelike selfvertroue sê dat dit onwaarskynlik is dat die kragnetwerk totaal ineen sal stort.
Eskom se bestuur het vroeër vanmiddag ‘n mediakonferensie gehou oor die stand van sake by die kragvoorsiener. Dit kom nadat fase 6-beurtkrag die naweek onbepaald ingestel moes word weens talle kragopwekkingseenhede wat onklaar geraak het.
Die hoofbestuurder van die stelseloperateur, Isabel Fick sê hoewel sy tans saam met die Nasionale Energiereguleerder, Nersa werk om beurtkragskedules aan te pas, beteken dit nié dat hoër fases as fase 6-beurtkrag sal geld nie.
Die nuwe skedules sal tye vir beurtkrag teen hoër fases as fase 8-beurtkrag aandui. De Ruyter het egter beaam dat hulle gereed is vir fase 8-beurtkrag en dat gebeurlikheidsplanne in plek is, hoewel hulle nie nou te bekommerd daaroor is nie.
Hy wou ook nie uitbrei op Eskom se beurtkrag-vooruitsigte vir die wintermaande nie omdat hy teen daardie tyd nie meer die uitvoerende hoof van die kragvoorsiener gaan wees nie.
Volgens De Ruyter sal fase 6-beurtkrag waarskynlik tot Woensdag geld. Eskom hoop om teen Donderdag fase 4-beurtkrag in te stel en as alles vlot verloop, hoop die kragvoorsiener dat fase 3-beurtkrag teen die naweek kan geld.
