4 Februarie 2022
Die bestuurder van die wit Porsche Cayenne, wat verlede naweek twee fietsryers op die R512 naby Lanseria raakgery het, sal Maandag 7 Februarie vir die eerste keer in die Randburg Landdroshof verskyn.
Die 51-jarige André Piehl is dood nadat hy sowat 400 meter ver gesleep is. Sy 60-jarige vriend, Jean du Preez is ernstig beseer en is steeds aan ‘n ventilator gekoppel.
LEES OOK: REGSFIRMA STAAN FAMILIE VAN FIETSRYERS BY NA MOTORIS HULLE RAAKRY
Volgens die woordvoerder van die Nasionale Vervolgingsgesag, Phindi Mjonondwane word die bestuurder van roekelose en nalatige bestuur asook strafbare mansslag en dronkbestuur aangekla.
Die regsfirma, Harrington Johnson Wands, wat die families verteenwoordig sê nog bewyse kon ingesamel word, wat beteken dat die verdagte nou in die hof kan verskyn. Megan Harrington-Johnson van die maatskappy sê hulle sal alles in hulle vermoë doen om te verseker dat geregtigheid geskied.
