7 Oktober 2024
Die VF Plus eis dat daar dringend stappe gedoen moet word teen ‘n amptenaar van die Nketoana-plaaslike munisipaliteit in die Vrystaat ((Arlington, Lindley, Petrus Steyn, Reitz) nadat hy glo onder die invloed van alkohol teen ʼn hoë spoed met ʼn munisipale voertuig in ʼn ongeluk betrokke was.
Die munisipale voertuig is erg beskadig nadat die amptenaar in ʼn droë spruit buite Petrus Steyn beland het terwyl hy op bystanddiens was.
Inligting dui daarop dat die polisie ‘n saak van dronk- en nalatige bestuur ondersoek.
Die VF Plus-raadslid in die Nketoana-munisipaliteit, Louise Bosman sê die burgemeester, Mamiki Nakedi het aan die party bevestig dat sy oor die afgelope twee jaar herhaaldelik die bewerings oor die drankmisbruik aan die hoof van die elektriese departement, William Koalepe, en die munisipale bestuurder, Solomon Nhlapo, oorgedra het.
Daar was egter nog geen optrede teen die betrokke amptenaar nie. Volgens Boshoff is dit onaanvaarbaar dat gevolgebestuur in die munisipaliteit nog altyd ontbreek het.
“Die munisipaliteit sal ook moet verduidelik wie vir die herstel van die voertuig verantwoordelik gehou gaan word. Dié voertuig word gebruik vir die herstel van kritieke dienste en kan nie onbepaald in onbruik staan nie.”
